Sejdiu mund të shpallë zgjedhje të jashtëzakonshme në Rahovec

Një fjalë e presidentit Fatmir Sejdiu, mund ta detyroj Qazim Qesken të futet prapë në garë për postin e të parit të Rahovecit. Ai është duke shqyrtuar letrën që AAK-ja dhe disa parti opozitare i kanë dërguar presidentit përmes së cilës kërkohet shpallja e zgjedhjeve të parakohshme në Rahovec.

Xhavit Beqiri, zëdhënës i presidentit të Kosovës, tha për Klan Kosova, se Sejdiu po pret sqarime nga Ministria e Pushtetit Lokal dhe KQZ-ja në mënyrë që të vendoset nëse do të shpall zgjedhjet e reja në këtë komunën që aktualisht udhëhiqet nga PDK-ja.

Beqiri, nuk e ka mohuar mundësinë që Sejdiu të vendos datën e zgjedhjeve të parakohshme.

“Unë nuk mund ta mohoj, por as ta pohoj një gjë të tillë. Kjo varet nga ajo çka ofron MPL dhe KQZ-ja”, ka thënë Beqiri për Klan Kosova.

Gjithçka do të varet se fare kërkese do t’i bëjnë Sejdiut, KQZ-ja dhe Ministria e Pushtetit Lokal. Kërkesa e partive opozitare, për zgjedhje të parakohshme në Rahovec i ka shkuar edhe shefit të ICO-së, Piter Faith.

Kryetari i Rahovecit, Qeska (PDK), eshte kthyer në punë javën e kaluar, 46 ditë pasi kishte shpallur dorëheqjen, për shkaqe shëndetësore. Ai këtë vendim e ka marrë pas një takimi që ka patur me kryeministrin Hashim Thaçi.

Pas këtij takimi AAK-ja kishte reaguar lidhur me “ndërhyrjen e kryeministrit” duke e konsideruar këtë si veprim të kundërligjshëm dhe antikushtetues.

“Tentimi për parandalimin e mbajtjes të zgjedhjeve të parakohshme është cenim i drejtpërdrejtë i ligjit dhe demokracisë”, thuhej në komunikatën AAK-së.

Në qoftë se Presidenti nuk merr vendim për shpalljen e zgjedhjeve të parakohshme, atëherë AAK-ja do ta dërgojë rastin “Qeska” për shqyrtim në Gjykatën Kushtetuese.